За убавината на надалеку познатата клисура Матка досега сме пишувале којзнае колку пати. Но овој пат ќе се осврнеме на нејзиното шаренило – прекрасните разнобојни пеперутки што таа грижливо ги чува во своите зелени прегратки.
Името пеперутка доаѓа од старогрчките зборови „λεπίδος“ – лушпа и „πτερόν“ – крило. Распространети се низ целиот свет. Скелетот им е надворешен и имаат шест нозе со кои ја препознаваат храната. Се хранат со нектарот од цвеќињата, но и со созреаните овошки. Сетило за мирис им се нивните антени. Пеперутките можат да летаат и до 1.600 км. и познати се како големи мигранти. Нивниот животен циклус има 4 фази: јајцe, ларва, кукла и адулт, а живеат до 4 недели.
Во светот постојат над 150.000 илјади различни видови пеперутки. Во Македонија има 202 вида дневни пеперутки, што претставува околу 50% од нивниот вкупен број во Европа. Само на Матка и во подрачјето на реката Треска има 119 видови дневни и 140 видови ноќни пеперутки, а се среќаваат и 77 видови на балканско ендемични мали пеперутки и уште 18 други видови кои се нови за науката. Некои од нив се на работ на исчезнување поради тоа што колекционерите незаконито ги собираат. Попознати видови пеперутки од ова подрачје се: Пругастата пеперутка (Iphiclides podalirius), Ластовичкина опашка (Papilio machaon), Црн Аполон (Parnassius mnemosyne), Поликсенова пеперутка (Zerynthia polyxena), Зелкар (Pieris brassicae), Планински белец (Pieris ergane), Круперов белец (Pieris krueperi), Мртовечки плашт (Nymphalis antiopa), Дневен пауновец (Inachis io) и Адмирал (Vanessa atalanta). Пеперутките Монтевелучи (Boloria graeca) која ја има на Пелистер и Чингова окатка (Pseudochazara chingovskii/Macedonian Grayling), светло сива пеперутка која се среќава само на Плетвар и никаде повеќе, се најпознати ендемични видови пеперутки во Македонија. Чинговата окатка е симбол на Македонија и е отсликана на поштенска марка.
Да ги заштитиме овие прекрасни пеперутки за нашите поколенија да можат да уживаат во нивната убавина.
